Hendorsche Firre
    (3 / 15)

Alexanderkirch (enna)

Kennziffor: 50

B´sonders schee isch hald des Ennere von d`r Alexanderkirch, weil älles zammabassa duad. Dem Gewölbe mid seine Kreizribba siehsch ned a, dass es bei seiner zarda Scheeheid so schwera Laschda  draga kann.

Wiea von selbschd guggsch uff dui Kanzel, diea mor om 1500 baud hod , ond ond du siehsch den Alexander , den Schutzpadron, als Pabschd mid andere Kirchavädd´r. Diea Kanzel soll ons sendige Menscha durch dui Figura von Adam ond Eva, grad wiea dor guad Adam mid dem Äpfl von dor Eva vorfierd wird, an onsere Onarda ond Senda erennera ond au do dra, dass wenn`s ons keua duad, älles vorgessa ond vorgäbba isch. Des zeigd der Weischdogg am Uffgang ond em Jesus sei Segenshand drieber.

En de drei Kirchaschiff kosch no viele Figura aus d´r Bibl a´gugga: d`r Mose, diea Apostel wo diea Evangelia g`schrieba hend ond viele Heilige. Diea Figura ond au diea Bilder wared fir d`Leid wiea a Bilderbuach, weil diea no ned hen schreiba ond au ned Lesa kenna. ond weil neamerd gwissd hod, wiea zom Beischbiel dor Markus ausgseha hod, hod der emmer irgendwo en Löwa g`hed ond so hod jeder gwissd, der do soll dor Markus sei. Ond oba em Turm hänged  sechs mächdige Glogga . Oina dorvo isch sell „ Concordia“, diea mir von Schillers Glogge kenna dean, war des a Gschäfd, des auswendig z`lerna!