Tobias-Mayer-Haus

Kennziffor: 37

D`r Schiller kennd jeder, aber wer isch seller Tobias Mayer? Do schanded Ihr grad vor seim Geburdshaus ond wissed von dem gscheida Mo nix! Siebzehahonderddreiazwanzg ( 1723) , also no vorrem Schiller, isch der en dem kloina ,oifacha Handwerkerheisle , grad do, gebora worda. No isch`r aber bald mid seine Leid noch Esslenga omzoga. Dord send boide Eldern jong gschdorba. Also war er a Waisakend, koi guader Schdard ens Läba.

Scho en d`r Ladeischual, do isch mor domols oft uff Empfehlung vom Pfarrer nei komma, wenn der äbb`gfonda hod ,wo`s zahld, scho do hod mor sei gscheids Kepfle entdeggd. Fir a Schdudium zahla hod sich aber neamerd meh g`fonda, moischdens hod g`hoißa: No krieagd der Beddlbua bloß en Goischd! So oiner brauchd doch ed schdudiera! So hod er sich älles aus Büacher sälber beibrenga missa, do gherd aber was dorzua! Nix hod ehn aber bremsa kenna ond so isch des blitzgscheide Beddlkend trotzdem scho mid bloß 26 Johr Profess`r en Göttingen worda. Des däd mancher Millionärsbua ned mol mid 200 schaffa. Bald war onser Mayer als Astronom en Europa ieberal bekannt.

Er hod entdeggd wiea mor an jeder Schdell uff onserer Weld sein Schdandpunkd genau fenda ko. Seid dem Tobias Mayer ko mor zur gegrafischa Breite, des sechd wiea weid oba oder onda uff dor Kugl bisch, au no dui geografisch Länge berechna . Seidher woiß mor au den genau Oschd-Weschd-Punkd, sogar uffem Meer. Wem des am moischda brochd hod , isch doch klar, de Engländer, denn diea send domols schon en älle Hergoddsländer gwä ond uff älle Meer romgsegeld ond seidam Mayer hen se au no genau gwissd, wo se ieberhaubd send. Jetzed hen se sich nemme gwonderd, dass am Sidpol Eis isch ond do koi Kokosnüss waxa dean. Au middem Mond hod er sich beschäfdigd ond von dem Doil, wo mor siehd, hod`r a Karda zeichend. Wenn mol des Mondaudole wieder laufa duad, no kos en dor Tobias-Mayer- Krater nei hagla ond no, no wärs vollends he.

Wie`s hald so emmer ganga duad, bleibed d`Domme läba, aber Gscheide, wiea onser Mayer, schderbed scho mid neinadreißig, so was o`grechds. Wenigschdens hod sei Widdwe no erläbd, wiea dui Entdeckung von ihrem Mo en englischa Wissenschafdspreis krieagd hod, ond diea englische Pfond hen erra sicher guad do. Was ihr hend ned älles midkrieagd? No ganged hald nei ond lassed` s Eich nomol erklära.

Was Se sonschd no wissa missad:

Tobias-Mayer-Museum