Rathaus und Markdtplatz

Kennziffor: 33

Weil se nach dem Brand von 1693 wahrscheinlich lang koi Geld ghed hend, isch des Rathaus erschd faschd 70 Johr schbäder, grad en der Zeid wo dor Schiller a Bua war, so om 1760, wieder uffbaud worra. Mid deane Arkada hod mor des nomol en dor Ard vomma Rathaus ausem Middelalder baud, ond diea send au heid no gschickd, denn do dronder kosch au beima Regawedder no a Schwätzle halda.

Frieher hosch em offena Erdgeschoss, dem Kaufhaus, s`Wichdigschd kaufa kenna: Floisch, Wurschd, Brod ond au des wichdig Salz, mid dem mor viel eigrieba hod, damids hebd ond ned nomm ganga duad. A großer Saal fird Feschd war au drenn ond ofd ganz oba d`Vorwaldung, dui hod no wenig Bedeiding ghed ond dor Bürgermeischder, dor Schuldes, war gleichzeidig Wird oder Bäckermeischder. En Steinheim oder Großbottwar kenned`r au ganz scheene Ratheiser a`gugga, diea send schdanda blieba.

Diea schenschde ond greschde Fachwerkheiser kosch en dor Marktschdroß schdanda seha, do hend die reichschde Bürger g`wohnd. Diea hend de Banka scheinds ned draud ond so hod mor emma Haus am Markdplatz, do wos Fotogschäfd drenn isch, 1986 beim Renoviera Münza ausem 14. Johrhonderd g`fonda, dor greschd Münzafond von ganz Deitschland. Dodraus kosch erkenna, wiea wichdich Marbach für d`Wirtschafd domols war.

Erschd noch dene zwoi Zerschderunga em Dreisgjähriga Krieg ond von 1693 wars mid dem vorbei. No wars nemme so wichdich, domid koi Geld meh do ond darom send kaum meh neie Heiser baud worra. Grad deshalb isch heid onser Altschdad so schee zom a`gugga.

Was Se sonschd no wissa missad:

Tourismusgemeinschaft Marbach-Bottwartal