Burgplatz

Kennziffor: 29

Gell, so a großer freier Platz middla ennera alda Stadt isch selda. Was do mol gschanda isch : Ha, seid elfhonderd onser Schdadtburg. Diea hod, des glaubsch ned, dor Markgraf von Bada baua lassa, onser domoliger Fürst. Der hod au onser Schdadt Marbach grendet . Also hemmir mol zu de Gelbfieaßler gherd ? Ed bloß mir, faschd älle Schdädt om ons romm, au Besigheim zom Beischbiel. Wahrscheinlich hod des diea wirdabergische Grafa gwurmd ond diea hend ons kaufd ond dornoch send diea Vögd en d`Burg gsessa, weil Herzög domols no uff dor Teck gwohnd hen ond des war viel zweid weg.

En dor Renessancezeit, also em fufzehnda ,sechzehnda Johrhonderd romm, wared diea schwäbische Herzög efders en Marbach ond hend do gjagd ond wahrscheinlich den guada Wei dronga. Bilder dorvo wäred em Schloss an de Wänd gmold gwä, was mor heid nemme seha ko, weil des beim Schdadtbrand sechzehahonderddreianeinzig (1693) ratzebutz abrend isch. Koiner hods meh uffbaud ,au ned, weil do koi großer Garda meglich war. No hod dor Herzog Eberhard Ludwig , a völlig oigawilliger Herrscher , praktisch uff dor greana Wiese seine „ Ludwigsburg“ baua lassa ond den Bauplatz bei ons hod`r vorgessa.

Heid wird uff dem Platz ond em Keller Theater gschbield ond Musik gmachd. Muasch hald mol vorbeikomma, wenn was los isch!