Torturm

Kennziffor: 26

Gell do guggsch! A rechder Denger , onser Torturm. Des isch des ledschde ond greschde von drei sodde Dor. Diea andre hemmer a`grissa, ond bhäb wiea m`r send, ihre Schdoi wieder vorbaud. Von dem Turm hod mor s`erschd mol om 1290 g`herd, also faschd en der Zeid, wo onsere Schdaufer, diea schwäbische Kaiser, regierd hend. Do sei uff dem Schalaturm onser Hochwachd g`sessa . Dui hod von dord oba nach de Feind ond vor ällem nach de Feuer gugga missa, weil von oba äba älles besser siehsch. Au heid no hosch aus derra lufdiga Höh diea beschd Sichd uff onser Städtle ond au ens Näggerdal mid seine schdeile Wengerd bis na nach Ludwigsburg, wo onser Firschd residierd hod, zom Glück weid gnuag weg.

M`r ko au heid no nuffschdeiga ond wenn`s duasch, merksch dorbei , wiea a`schdrengend des Uff ond Ab für den Türmer en alder Zeid gwä sei muaß. Do brauchsch a guade Kuddl. Diea ledschd Bewohnere hod vom erschda Krieag bis Siebenafufzig ohne Wasserloidung ond bloß middama Kanonaöfale do oba g`hausd. Noi, des däded d`Jonge nemme, diea welled dreimol am Dag sich duscha, au wenn`s o`gsond sei. Heid isch a klois Museum mid alde Sacha ond Bilder en oim Turmschdieble drenn ond mor ko au ois fir a oiges Feschdle mieada.