Südliche Schdadtmauer

Kennziffor: 21

Gell, do guggsch! Des isch a rechde Schdadtmauer. Do wird manch oiner en alder Zeit scho dorvor gschdanda sei ond nei wella han , aber ned kenna, weil se so hoch war. Ens Egg nei hod mor dor Diebs- oder Malefizturm baud, des war onser Gfängnis, do hod mor des Gsendl ond diea Malefizkerle bei Wass`r ond Brod eigschberrd, wenn se was v`r bosged ghed hen. A reachda Schdrof fir en Schwoba, johrelang ohne onsern Wei ond au ohne Läberwursch!

Weider oba schdoahd a Rondellturm, der hoad zur äußera Schdadtmauer gherd, die sonschd nemme zu seha isch. Des isch a Zwingerturm ond der schdoahd zur Hälfd em Boda, doran koasch seha wiea breid ond dieaf onser Graba frieher gwä isch. Ond der isch faschd omd ganz Schdad ganga.

Zum Glück koa mor hier an der Südseide no heid die guade Befeschdigung von onserer Schdadt seha, au weil se diea Mauer als Hausmauer vorwended ond oifach überbaud hen. So isch se schdanda blieba. A Mauerschdügg siehd mor au no uff dor Oschdseide.

Von dor äußera Mauer send bloß no oinzelne Breggala erhalda. Über diea ronde Rondelltürm hod mor dor Feind, wenn`r d`Mauer nuffgräbseld isch, von dor Seid beschieaßa kenna. Ischer trotzdem läbendich nieberkomma, no ischem em Zwenger d`r Garaus gmachd worda. Do hod morn dann en dor Zanga ghend ond von henda ond vorna ond von oba ra beschossa ond teerd.

Der isch dod oder läbendich niea meh noch Marbach komma. Sodde welled mir au ned bei os, Gäschd aber send emm`r willkomma.