Wilde-Mann-Bronna

Kennziffor: 06

Bronna hods frieher en onserem Marbach viele gäba, diea hod mor au brauchd, weils Wasser no ned middera Leidung ens Haus gloffa ich. Oin Vordoil hods ghed: S´hod no koin Wasserschada em Haus gäba. Oiner schdohd no, dor Wilde- Mann_ Bronna, miderra Räubergschdald oba druff. Vor där hemmir als Kender emm`r Angschd ghed, grad wiea vorrem Nachdgrabb. War des der böse Mo , der sich en de Wälder bei Marbach vorschdeggd hod

om diea reiche Kaufleid, diea Pfeffersäck, ausz`rauba? Irgendwie hod mor´n aber au leida kenna, sonschd dürfd er ned onser Schdaddwabba en dor Hand heba. Vielleichd wars aber au onsere Schutzfigur, die en seiner grausiga Art des Beese hod abhalda solla. Am End kommds sogar von de Remer, diea lang en Benninga a Kaschdell ghed hen, no wärs onser Namensgeber, dor Mars-Bacchus, a weiseeliger Krieagsgodd. Onsern Nama „Marbach“ ko mor nämlich vorschieda deida: remisch: als Marsbacchus , der Mars des isch dene ihr Krieagsgodd gwä, doher de Schdogg ond Bacchus, des isch der emmer leichd bsoffene Weigodd gwä, doher des Weilaub, denn en de Reba drenn isch`r glä, wenn`r sein Rausch ausgschlofa hod. od`r: als Markbach, sell hoißd Grenzbach, des wär au meglich, denn no wär onser Bach dui Grenz zwischa de Franka, em Norda ond de Alemanna em Süda gwä. Des däd au zum Stadnama bassa, denn Ord mid „bach“ henda send alemanisch ond sodde mid „heim“ henda, wiea Steinheim, fränkisch. Des kend so sei,od`r? Em neinzehnda Johrhonderd hod mor no gmoind onser Nama käm wäga dem wilda Mo von „Mordbach“, aber do glaub i lieaber ned dro, denn wer möchd emma Mörderneschd wohna?