Hendorsche Firre
    (2 / 15)

Alexanderkirch (außa)

Kennziffor: 01

S`ko sei, dass an derra Schdella, grad wo heid diea groß Kirch schdanda duad, scho em 8. Jahrhonderd a kloina Kirch middera Mauer drom romm gschdanda isch, en der hosch de vor Raiber ond andrem Gsendel vorschdegga kenna. So zwischa 1100 ond 1200 war diea wohl z`klei gworda ond mor hod a greßera Säulabasilika mid drei Schiff  an derra Schdella baud. Diea hen dann onsere wirdabergische Herzög om fufzehahunderd nommol umbaud , siea sen do grad ned so bhäb gwä ond hen  am Ende von der gothischa Zeid  iberal baud. Heid woiß mor nemme gnau, wer was wann baud hod ond wer uff des o`gwehnliche Gwölb komma isch. Isch doch au gleich, weils sche ausseha duad ond au ed zemahurgeld.

Ganz oba uff dor Südseid vom langa Schiff hen se sogar en römischa Schdoi eigmauerd  vom Johr  145 . Den hen se en Benninga midlaufa lassa, da war nämlich a römischa Burg,  von dord hen se onsern Negger, der war domols diea Grenz,  bewachd ond nadierlich guggd, das koi so wilder Marbacher rieberchwemma duad. Am End isch dann älles anders komma, wiea mor denkd hod: Onsere Aldvordere, diea Germana hen gwonna, send schbäder  Chrischa worda ond hen diea Heidaen d`Fluchd gschlaga  . Zom Zoicha dofir hend se den Schdoi uffem Kopf eibaud, weil s` Chrischdatum oifach so schdarg war. Wieas heid dormid ausseha duad, woiß mor ned.